ਕਿਸਾਨ ਦੀ ਹਾਲਤ ਤੇ ਕਵਿਤਾ :- ਸਾਡੀ ਫਸਲਾਂ ਦਾ ਮੁੱਲ ਮੋੜ | ਕਵਿੱਤਰੀ ਪ੍ਰਭਜੀਤ ਕੌਰ ਦੀ ਲਿਖੀ ਕਵਿਤਾ
ਕਿਸਾਨ ਦੀ ਹਾਲਤ ਤੇ ਕਵਿਤਾ
ਸਾਡੀ ਫਸਲਾਂ ਦਾ ਮੁੱਲ ਮੋੜ ਵੇ ਬਾਬਾ,
ਸਾਡੀ ਫਸਲਾਂ ਦਾ ਮੁੱਲ ਮੋੜ।
ਮੰਡੀਆਂ ਦੇ ਵਿਚ ਰੁਲਦੀ ਫਿਰਦੀ ਪੁੱਤਾਂ ਵਾਂਗੂੰ ਪਾਲੀ,
ਕੋਈ ਨ ਪੁੱਛੇ ਵਾਤ ਸਾਡੀ ਨੂੰ ਭਾਵੇਂ ਦਿਨ ਹੋਗੇ ਨੇ ਚਾਲੀ,
ਸਾਡਾ ਕਿਤੇ ਨਾ ਚਲਦਾ ਜੋਰ ਵੇ ਬਾਬਾ,
ਸਾਡੀ ਫਸਲਾਂ ਦੇ ਮੁੱਲ ਮੋੜ।
ਹਾੜ ਦੀਆਂ ਤਿੱਖੀਆਂ ਧੁੱਪਾਂ ਨੂੰ ਮੈਂ ਪਿੰਡੇ ਉਤੇ ਹੰਢਾਵਾਂ,
ਪੋਹ ਦੀ ਚਾਨਣੀ ਸੀਨਾ ਚੀਰੇ ਤਾਂਹਵੀਂ ਪਾਣੀ ਲਾਵਾਂ,
ਸੱਪ, ਡੱਡੀਆਂ ਨੂੰ ਰਖਾਂ ਪੈਰਾਂ ਹੇਠ ਮਰੋੜ ਵੇ ਬਾਬਾ,
ਸਾਡੀ ਫਸਲਾਂ ਦੇ ਮੁੱਲ ਮੋੜ।
ਮਿੱਟੀ ਵਿਚੋਂ ਅੰਨ ਉਗਾ ਕੇ ਜਿਹੜਾ, ਜੱਗ ਦੀ ਭੁੱਖ ਮਿਟਾਵੇ,
ਓਹੀਓ ਅੰਨ ਦਾ ਦਾਤਾ ਅੱਜ ਭੁੱਖਾ ਮਰਦਾ ਜਾਵੇ,
ਮਹਿੰਗਾਈ ਨੇ ਤੋੜ ਦਿੱਤੀ ਏ ਸਾਡੀ ਕੰਗਰੋੜ ਵੇ ਬਾਬਾ,
ਸਾਡੀ ਫਸਲਾਂ ਦੇ ਮੁੱਲ ਮੋੜ।
ਸਾਥਣ ਮੇਰੀ ਆਥਣ ਤਾਈਂ ਚੁੱਲ੍ਹੇ ਰੁੱਝੀ ਮਨ੍ਹੇਰੇ ਤੋਂ,
ਵਿਚ ਗ਼ਰੀਬੀ ਰੁਲੀ ਜਵਾਨੀ ਕੁਝ ਨਾ ਸਰਿਆ ਮੇਰੇ ਤੋਂ,
ਹੁਣ ਤੂੰ ਹੀ ਦਿਨਾਂ ਨੂੰ ਮੋੜ ਵੇ ਬਾਬਾ,
ਸਾਡੀ ਫਸਲਾਂ ਦੇ ਮੁੱਲ ਮੋੜ।
ਰਹਿੰਦਾ ਏ ਫ਼ਿਕਰ ਨਿੱਤ ਧੀ ਜੋ ਕੁਆਰੀ ਦਾ,
ਕੋਠੇ ਜਿਡਾ ਪੁੱਤ ਮਾਰਿਆ ਬੇਰੁਜ਼ਗਾਰੀ ਦਾ,
ਇਸ ਦਲਦਲ ਦਾ ਲੱਭਦਾ ਨਾ ਕੋਈ ਤੋੜ ਵੇ ਬਾਬਾ,
ਸਾਡੀ ਫਸਲਾਂ ਦੇ ਮੁੱਲ ਮੋੜ।
ਇਕ ਕੁਦਰਤ ਨੇ ਕਹਿਰ ਮਚਾਇਆ,
ਇਕ ਸਰਕਾਰਾਂ ਵੈਰ ਕਮਾਇਆ,
ਤੂੰ ਹੀ ਕੱਢ ਨਿਚੋੜ ਵੇ ਬਾਬਾ,
ਸਾਡੀ ਫਸਲਾਂ ਦੇ ਮੁੱਲ ਮੋੜ।
ਜਾਵੇ ਨਾ ਜਹਾਨੋਂ ਕੋਈ ਗ਼ਰੀਬੀ ਮਾਰਿਆ,
ਰੱਖ ਲਵੀਂ ਪੱਤ ਨਾਨਕਾ ਨਿਰੰਕਾਰਿਆ,
“ਪ੍ਰਭਜੀਤ” ਕਰੇ ਅਰਜ਼ੋਈ ਹੱਥ ਜੋੜ ਵੇ ਬਾਬਾ,
ਸਾਡੀ ਫਸਲਾਂ ਦੇ ਮੁੱਲ ਮੋੜ।
ਸਾਡੀ ਫਸਲਾਂ ਦੇ ਮੁੱਲ ਮੋੜ ਵੇ ਬਾਬਾ,
ਸਾਡੀ ਫਸਲਾਂ ਦੇ ਮੁੱਲ ਮੋੜ।
ਪੜ੍ਹੋ :- ਕਿਸਾਨ ਤੇ ਪੰਜਾਬੀ ਕਵਿਤਾ | ਮੈਂ ਇਕ ਗ਼ਰੀਬ ਜਿਹਾ ਕਿਸਾਨ ਆਂ
ਕਵਿੱਤਰੀ ਬਾਰੇ :-
ਨਾਮ : ਪ੍ਰਭਜੀਤ ਕੌਰ
ਪੇਸ਼ਾ : ਅਧਿਆਪਿਕਾ
ਸ਼ੌਂਕ : ਲਿਖਣਾ ਤੇ ਪੜ੍ਹਨਾ
Insta Page : ਮੇਰੇ ਤੋਂ ਤੇਰੇ ਤੱਕ
” ਕਿਸਾਨ ਦੀ ਹਾਲਤ ਤੇ ਕਵਿਤਾ ” ਬਾਰੇ ਕੰਮੈਂਟ ਬਾਕਸ ਵਿੱਚ ਤੁਸੀਂ ਆਪਣੀ-ਆਪਣੀ ਰਾਇ ਜਰੂਰ ਦੱਸੋ। ਜਿਸ ਨਾਲ ਕਵਿੱਤਰੀ ਦੀ ਹਿੰਮਤ ਅਤੇ ਸਤਿਕਾਰ ਵਧਾਇਆ ਜਾ ਸਕੇ। ਜੇਕਰ ਤੁਸੀਂ ਵੀ ਰੱਖਦੇ ਹੋ ਲਿਖਣ ਦਾ ਹੁਨਰ ਅਤੇ ਤੁਸੀਂ ਚਾਹੁੰਦੇ ਹੋ ਕਿ ਤੁਹਾਡੀ ਰਚਨਾ ਬਲਾੱਗ ਰਾਹੀਂ ਸਾਰੇ ਪਾਠਕਾਂ ਤਕ ਪਹੁੰਚੇ। ਤਾਂ ਆਪਣੀ ਕਵਿਤਾ, ਕਹਾਣੀ ਜਾਂ ਲੇਖ ਭੇਜੋ ਇਸ ਈ-ਮੇਲ [email protected] ਤੇ ਜਾਂ ਸਾਡੇ ਵਹਟਸਐੱਪ ਨੰਬਰ 9115672434 ਤੇ।
ਧੰਨਵਾਦ।